Calendièr de las règlas : calcular tas règlas venentas

Saber quand arriban tas règlas, es mens de suspresas e mai de serenitat. Vaquí cossí fonciona lo calcul, e çò qu’es normal o pas.

Cossí se calcula un cicle

Un cicle comença lo primièr jorn de las règlas (lo jorn 1) e s’acaba la velha de las règlas seguentas. Per conéisser la durada de ton cicle, compta los jorns entre dos primièrs jorns de règlas.

Sovent se parla de 28 jorns, mas es una mejana : per una adulta, un cicle de 21 a 35 jorns es considerat coma abitual. A l’adolescéncia, e dins las annadas que precedisson la menopausa, los cicles pòdon variar mai.

Calcular la data de las règlas venentas

Lo metòde mai simple : prene la durada mejana de tos darrièrs cicles e l’apondre al primièr jorn de tas darrièras règlas. Mai nòtas de cicles, mai l’estimacion es justa. Una variacion de qualques jorns d’un mes a l’autre es frequenta : estrès, viatge, malautiá o cambiament de ritme pòdon decalar las règlas.

Quant de temps duran las règlas ?

Las règlas duran mai sovent de 3 a 7 jorns, amb en general un o dos jorns mai abondoses al començament. Notar lo flux jorn per jorn ajuda a reperar çò qu’es abitual per tu.

Quand ne parlar a un mètge

• Tos cicles son sovent mai corts que 21 jorns o mai longs que 35 jorns.
• As pas agut de règlas dempuèi 3 meses (fòra prenhesa, alachament o contracepcion que las suprimís).
• Tas règlas duran mai de 7 jorns o son tan abondosas que te cal cambiar de proteccion cada ora.
• Sagnas entre las règlas o aprèp un rapòrt.

Ragnagna es pas un dispositiu medical e remplaça pas l’avís d’un professional de la santat. En cas de dobte, parla-ne a ton mètge, a ta levadora o a ton ginecològ.